विश्व चर्चित गीत गङ्नम स्टाइलका गायक पिएसवाईको दोस्रो गीत
जेन्टलम्यानलाई प्रतिबन्ध लागेको छ । गीतलाई उनकै देश दक्षिण कोरियाले
प्रतिबन्ध लगाएको हो । दक्षिण कोरियाको ब्रेडेकास्ट सिस्टमले गीतको
प्रचारका लागि बनाइएको भिडियोमा आपत्ती जनाउँदै प्रतिबन्ध लगाएको छ ।
भिडियोमा गायक पिएसवाई सडकमा हिँड्दा ट्राफिक नियम पालना नगरेको र
सार्वजनिक सम्पत्तीमा नोक्सान पुर्याएको देख्न सकिन्छ । यसका अलवा गायकले
महिलासँग अभद्र रूपमा प्रस्तुत भएका प्रसंग पनि केही छन् ।यसअगाडि निर्माण भएका केही भिडियो यस्ता विषयका कारणले प्रतिबन्धमा परेका कारण पिएसवाईको यो भिडियोलाई पनि प्रतिबन्ध लगाइएको ब्रेडेकास्ट सिस्टमले जानकारी गराएको छ । भिडियोमाथि प्रतिबन्ध लागेको पिएसवाईका मेनेजरले स्वीकार गरेका छन् । भिडियोमाथि प्रतिबन्ध लागे पछि पुन: परिस्कृत गर्ने नगर्ने भन्ने विषयमा मेनेजरले केही खुलाउन चाहेनन् । पहिलो गीत गङ्नम स्टाइलले यु ट्युबमा कीर्तिमान बनाउन सफल भएकै कारण यी गायकले दोस्रो गीत पनि ल्याएका हुन् ।
गङ्नमबाट प्रेरित यी गायकको जेन्टलम्यान गीत सार्वजनिक भएके दिन यु ट्युबमा करिब साढे ४ करोडले अवलोकन तथ्य सार्वजनिक भएका छन् । अहिले पनि भिडियो हेर्ने संख्या दिनदिनै बढ्दै छ । अहिलेको गतीले अगाडि बढ्ने हो भने जेन्टलम्यानले गङ्नम स्टाइल जित्ने अनुमान लगाइएको छ । यी गायकका गङ्नम स्टाइल गीत यु ट्युबमा राखेको नौ महिनामा १ अर्ब ५२ करोडले हेरेका थिए । पछिल्लो गीतको नाम जेन्टलम्यान भए पनि भिडियोमा अभिनय गर्ने क्रममा गायक जेन्टलम्यानका रूपमा प्रस्तुत भएका छैनन् । गायक यो भिडियोमा जेन्टलम्यानका विपरीत भूमिकामा देखिएका छन् । (एजेन्सी)
